Vieiros

Comentar as novas, introducir informacións no OpenVieiros ou iniciar debates, son de momento as principais posibilidades para os internautas rexistrados en Vieiros. Un milleiro de internautas deron xa o paso.

Reserva xa a túa identidade en Vieiros no espazo de rexistro!

OpenVieiros: a noticia pola ti
O sistema é moi simple. Antes de nada: debes ser usuario rexistrado en Vieiros, ter un "Vieiros de meu".

Para introducir a túa noticia, o primeiro paso é premer na opción "Enviar unha nova", que ves no cabeceiro. Aí entras nun editor moi sinxelo onde verás tres caixas: Título, Entradiña e Texto. Na parte de arriba de cada unha delas tes unhas ferramentas para poñer negriñas, cursivas, subliñados ou poñer links. Abaixo tamén están as correspondentes caixas a través das cales adxuntar fotografías ou documentos. En canto teñas o texto listo, preme o botón "Enviar".

Na portada do Open Vieiros verás dúas columnas. Á dereita as informacións segundo van chegando ao editor. Á esquerda, as que van pasando a portada. A redacción de Vieiros encárgase de actualizala varias veces ao día.

E agora: os debates
En probas desde a pasada noite electoral, a pé do Open Vieiros achegámosvos agora outra ferramenta. Calquera internauta rexistrado pode propoñer asuntos para a discusión. De xeito moi simple, con só premer no apartado "Iniciar debate" un formulario pídevos un título, afirmación ou pregunta, e unha breve explicación. Automaticamente, a proposta de discusión aparece visíbel para o resto de participantes.