Vieiros

A secretaria xeral de Política Lingüística, Marisol López, recoñeceu este venres no Parlamento que a industria xogueteira pon numerosos atrancos para fabricar bonecos que falen na nosa lingua. López contestou a diferentes preguntas do BNG sobre a normalización do noso idioma neste sector. A secretaria xeral explicou que o seu departamento contactou, e seguirá a contactar, coas industrias mais matizou que non está disposta a asumir o que queren algunhas firmas: que a administración merque con cartos públicos partidas de xoguetes.

O deputado nacionalista Bieito Lobeira valorou positivamente os pasos dados pola secretaría xeral neste eido pero sinalou que é preciso aumentar o esforzo. Lobeira cre que onde máis se ten avanzado é en literatura infantil pero sinalou que hai graves carencias nos aparellos informáticos, na dobraxe e nos bonecos.