Vieiros

Xavier Gómez Noya partía como gran favorito para a proba de Beixín, a onde chegou como actual Campión Mundial e líder invicto da Copa do Mundo. O ferrolán controlou a carreira en todo momento, nadando entre os primeiros, para facer a transición á bicicleta en 7º lugar tan só 13' detrás do líder Shane Reed e 12' diante de Iván Raña. Os galegos mantiveron boas posicións durante o tramo de ciclismo, sen entrar aos múltiples ataques que se foron sucedendo. A carreira endureceuse a partir da 3ª volta ao circuíto e así, no final da 4ª formouse unha escapada que acadou certas diferencias. Estaba integrada polo mexicano Serrano (que non tardaría en quedarse atrás), o luxemburgués Borkel e o Belga Zeebrock. Non eran corredores importantes, polo que se lles permitiu chegar cunha vantaxe próxima ao minuto ata o comezo dos 10 quilómetros reservados para a carreira a pé.

Exhibición sen premio
Os dous galegos chegaron moi ben situados á segunda transición, e colocáronse nas primeiras posicións do grupo perseguidor que foi mermando a diferencia cos escapados ata neutralizalos ao final da segunda volta ao percorrido pedestre. Desde entón, Raña púxose primeiro, seguido de Gómez Noya. O de Ordes fixo un drástico cambio de ritmo mediado o terceiro xiro, que non acadou o resultado agardado e rematou por pasarlle factura. Iván descolgouse a falta de case tres quilómetros, deixando en cabeza o cuarteto formado por Wihtfield (Canadá), Frodeno (Alemaña), Doherty (Nova Celandia) e o galego Gómez Noya, que o relevou á fronte da carreira.

O ferrolán levou a cabo a súa táctica habitual, consistente nun aumento progresivo do ritmo, pero as súas forzas parecían non estar tan por enriba do resto como estamos acostumados, e os tres rivais aguantaron ata a entrada na recta final. Gómez Noya non é un home de sprint, e pareceu un pouco xusto de forzas ao final, polo que foi o primeiro en ceder cando nos metros finais comezaron os ataques para repartir as medallas. Ao final a sorpresa foi enorme cando o alemán Jan Frodeno acadou a vitoria, primeira para el nunha gran proba, seguido de Wihtfield e Doherty. A 20 segundo do vencedor entraba Xavier Gómez Noya, e só 8 despois facíao Raña.




Así o seguiu Vieiros en directo:



5h50: Ouro para o alemán Frodeno. Whitfield consegue para Canadá a prata. Nova Celandia queda co bronce de Docherty. Galiza deixa a pegada no 4º e 5º lugar de Xavier Gómez Noya e Iván Raña.

5h49: Descólgase Gómez Noya! Diante sprinta Frodeno cara ao ouro. Whitfield ségueo pola prata. Docherty será bronce. Noya vai chegar cuarto. Atrás vemos a Raña no quinto lugar.

5h48: Coa meta á vista, o trío de cabeza perde gas. Únese Whitfield, un home perigoso no sprint final.

5h45: Noya márchase con Frodeno e Docherty. Whitfield semella non poder manter o ritmo. Tres atletas para tres medallas.

5h40: Gómez Noya acelera o paso. Raña descólgase un chisco. Só Frodeno, Whitfield e Docherty parecen poder seguirlle a sombra. Soa a campá. Dous quilómetros e medio para o reparto de medallas!!

5h35: Trote poderoso do de Ordes que lidera o grupo. Collen auga. Cinco corredores en cabeza. A Raña, Noya, Brownlee e Docherty únese o mangallón alemán Jan Frodeno. E atención ao sexto en discordia: o canadense Simon Whitfield, campión olímpico en Sidney. Media ducia de aspirantes a repartírense tres medallas.

5h31: Raña escapa!! Ségueo Noya. Só Brownlee parece capaz de seguilos. O neocelandés Bevan Docherty úneselles desde atrás.

5h30: Neutralizados os escapados. O danés Rasmus Henning colle o temón do grupo. O británico Alistair Brownlee a pé del. Xusto atrás deles Raña e Noya.

5h26: No paso diante do palco, ateigado de seareiros, o dúo cabeceiro leva apenas 25'' de vantaxe. Os grupo perseguidor aperta o paso e estírase.

5h24: Atrás de Zeebroke e Bockel fórmase un grupo dunha ducia de corredores. Entre a media ducia dos que o lideran vemos a Raña e Noya.

5h18: Iván Raña deixa a bici e inicia 8º a carreira a pé, a 56'' dos primeiros. Gómez Noya é 15º nesta transición, a 58''. No dúo de cabeza, o luxemburgués Bockel parece máis forte e colle uns metros.

5h16: Bonita e deportiva imaxe. Zeebroke e Bockel chócanse as mans amistosamente medio minuto antes de deixaren as bicis.

5h12: Quédase Serrano. Zeebroke e Bockel vanse sós. Atrás o portugués Bruno Pais fai un intento sen éxito de marchar do grupo. Os dous de cabeza de carreira conseguen poñer 44''.

5h05: Nova Zelandia, un dos equipos poderosos, asoma pola cabeza do pelotón. Con todo, non parece haber vontade real de combinar esforzos para neutralizar os escapados. Bockel é o primeiro no paso por meta. Serrano aparece como o menos colaborador entre os tres de diante.

5h04: O trío cabeceiro vixíase. Non parece haber colaboración mentres atrás o grupo estira e aumenta a velocidade. Son 28'' de vantaxe para os escapados.

5h00: Os escapados tiran 25'' adiante do pelotón. Noya e Raña cruzan desta vez 19º e 25º.

4h55: O mexicano Serrano, o luxemburgués Bockel e o belga Zeebroke animan a carreira agora cuns metros de vantaxe.

4h45: Ritmo de carreira lento. O belga Croes chega uns segundos diante do grupo que abre o brasileiro Moreira. Un grupo moi numeroso para esta altura de carreira. No medio do pelotón, Raña pasa 18º e Noya 31º.

4h38: O xaponés Yamamoto pega un sprint lixeiro para pasar destacado por diante do público. No grupo e sen perder corda coa cabeza, Gómez Noya e Iván Raña van xuntos, 15º e 22º respectivamente, apenas a 5''.

4h30: Amplo pelotón. Gómez Noya marcha 9º. Iván Raña no posto 16º. Ben colocados os dous. O de Ordes tivo sempre na bicicleta unha das súas probas preferidas.

4h18: Shane Reed sae primeiro da auga. Deixa o cronómetro en 18h28. Xavier Gómez Noia ven en cabeza. Marca 7º ao coller a bicicleta. Só 7'' de desvantaxe con Reed. Iván Raña chega un chisco máis atrás, pero tamén ben colocado, no posto 25º a apenas 20''.

4h15: Shane Reed destácase na auga. O neocelandés chega especialmente ben aos Xogos. Asinou o seu pase gañando unha proba do campionato ITU en Wellington por diante de Bevan Docherty, tamén de Nova Celandia, e un dos favoritos este martes. Naquela mesma proba a australiana Emma Moffat, bronce este luns na proba olímpica feminina, chegou primeira.

4h00: Saída!!

3h57: Como número un do ranking ITU, Gómez Noya puido escoller primeiro para esta cita olímpica á hora de repartírense os lugares de saída no peirao. O ferrolán vaise botar á auga desde a parte esquerda. O caos da saída complica ás veces o treito inicial na auga dos triatletas.

3h55: O escenario da proba é a Represa das Tumbas Ming. É unha instalación que será desmantelada ao finalizaren os Xogos. Por este motivo, a reutilización posterior dos materiais foi decisiva á hora de deseñar o proxecto. Así, a goma será destinada a uso escolar e o aceiro cederase a empresas de construción. Ademais, a enerxía empregada na iluminación procede de paneis solares, e a propia área de oficinas foi habilitada na área de xestión do Parque de Atraccións Jiulong, polo que retornará á súa función orixinal logo do evento. O recinto ten capacidade para até 10 mil localidades.

3h50: Día de calor abafante no contorno da represa das Tumbas Ming. Galiza aspira nesta xornada a gozar da competición olímpica co valor engadido da presenza entre os favoritos ás medallas de dous galegos. O poder amosado no último ano polo ferrolán Xavier Gómez Noya e o excelente estado de forma do veterano Iván Raña, convértenos en opcións serias a subir ao podio este martes.