Vieiros

Un total de 39 centros educativos participaron, dende o 15 de xaneiro até o 29 de marzo, nos campamentos en defensa do monte galego postos en marcha pola Dirección Xeral de Xuventude. O obxectivo foi o de concienciar os escolares da importancia de preservar e coidar a riqueza forestal do país.

O programa piloto Vive en defensa do monte galego comezara xa o 6 de novembro de 2006, e contou coa participaron de 14 centros escolares e un total de 91 alumnos. Xa que logo, a Dirección Xeral de Xuventude decidiu estender o proxecto para concienciar os mozos da importancia da prevención como método de conservación do patrimonio natural, analizar os impactos do problema dos lumes e recuperar os montes.

Actividades diversas
Durante estes campamentos, en que que participaron alumnos de 3º e 4º da ESO e de 1º de BAC, plantáronse especies herbáceas -gramíneas e leguminosas-, recolléronse sementes de especies arbustivas de alto interese faunístico e realizouse un viveiro e secador de especies arbustivas e caducifolias, entre outras actividades.

Ademais, realizáronse rutas divulgativas para fortalecer os coñecementos en fitoxeografía e en identificación de especies, talleres de reciclaxe e actividades de interpretación do patrimonio natural. Tamén se analizaron os impactos dos lumes en ríos, rías e na atmosfera, e realizouse unha aproximación ao aproveitamento sustentábel do medio rural.