Vieiros

A Federación Galega de Municipios e Provincias, a Fegamp, encamiñábase cara a un treito decisivo, despois de ser capaz de negociar o estabelecemento do Pacto Local, imposíbel durante o anterior goberno de Manuel Fraga e chegado á fin a bo porto no diálogo liderado polo conselleiro de Presidencia, Xosé Luís Méndez Romeu. O escenario optimista creado nun tempo que coincidía co alcalde de Lalín e presidente saínte da Fegamp, Xosé Crespo, do PPdeG, facía pensar que o punto de inflexión nas últimas eleccións municipais contribuiría a un contexto aínda mellor para os desafíos pendentes.

PSdeG e BNG chegaban á cita co novo deseño para a Federación Galega de Municipios mesmo cun pacto por escrito, onde se comprometían a unha presidencia de quenda no organismo, que iniciaría o representante proposto polo Bloque. O trasacordo do PSdeG, despois de que o PPdeG renunciase a unha presidencia en tres quendas, racha a boa sintonía que se prognosticaba posíbel.

"A actitude de PP e PSOE condena esta entidade a ser un instrumento político", laiouse este mércores o secretario de Organización do BNG, Alberte Ansede, lembrando que o valor da Fegamp era precisamente a súa capacidade de ser "punto de encontro" para a defensa conxunta dos intereses dos concellos. Ansede acusa os socialistas de tomaren "hai xa unha semana" a decisión de "romper o acordo nacional entre as dúas forzas" e quéixase de que non intentasen "ningún contacto" para tratar de reconducir a situación. Así e todo, os nacionalistas agardan que durante a xornada deste xoves, na que se celebrará a asemblea da Fegamp, sexa posíbel recuperar un acordo "bipartito ou tripartito".

Desde o PSdeG, o secretario de Organización, Ricardo Varela, insiste en que alén do asinado anteriormente, a proposta do BNG de rotar a presidencia "non é razoábel se non participa o PP", e afirma que a rotación "só tería sentido se houbese un consenso amplo" de todos os grupos da Fegamp. Ao respecto da posibilidade de que interveñan na negociación os máximos dirixentes de PSdeG e BNG, Emilio Pérez Touriño e Anxo Quintana, Varela asegurou que os dous "coñecen a situación" e que as súas posicións concordan coas dos seus respectivos partidos. Os contactos de Touriño e Quintana non conseguiron polo momento a recuperación do diálogo a nivel da Fegamp e agárdase que a cita do Consello da Xunta deste mesmo xoves sexa unha nova oportunidade para o posíbel acordo entre PSdeG e BNG.

Queixas dos alcaldes "independentes"
O rexedor oleirense, Anxo García Seoane, alcalde á fronte da lista de Alternativa dos Veciños, era este mércores a voz dos concellos onde non goberna ningunha das tres forzas con representación parlamentaria, queixándose do manexo que, na súa opinión, están facendo estas formacións coa Fegamp. "Agora tamén queren suprimir os alcaldes independentes", laiouse García Seoane, criticando o labor da Fegamp durante os últimos anos, segundo el, moi pouco produtiva.