Vieiros

O Comité contra a Tortura da ONU afirmou que o uso dos táser, pistolas que disparan fortes descargas eléctricas co obxectivo de atordoar, é un xeito de tortura que pode matar. Despois de varias mortes producidas por estas armas en Norteamérica, o comité, formado por dez expertos, decidiu que o seu uso “causa dor aguda, o que constitúe unha forma de tortura”.

O grupo considera que “en certos casos, poden mesmo producir a morte, como xa amosaron estudos críbeis e os acontecementos recentes”, en referencia ao pasamento de tres cidadáns estadounidenses de arredor de 20 anos e un home polaco de 40 anos en Vancouver (Canadá), na pasada semana.

O comité da ONU fíxolle esta advertencia a Portugal, que xa mercou o modelo máis avanzado da arma, o Taser X26, para o seu uso policial. “Debe considerar abandonar o uso” desta arma, pois pode producir un grave impacto físico e mental nos afectados, o que viola a Convención das Nacións Unidas contra a Tortura, aseguran os expertos.

Segundo a información que publica o xornal australiano The Daily Telegraph, o fabricante da arma deféndese argumentando que as mortes “se poden atribuír a outros factores e non ás descargas eléctricas de pouca potencia da arma”.